Aşiqanə mövzuların qəzəllə yanaşı, lirik mənzum əsərlər formasında yaranması farsdilli poeziyada çox böyük vüsət tapmışdır. XII yüzillikdə dahi Azərbaycan şairi Nizami Gəncəvinin yaradıcılığı romantik poemaların tarixində ən böyük zirvədir.
O özündən əvvəlki məşhur məhəbbət əfsanələrini nəzmə çəkərək Şərq ədəbiyyatının nadir incilərini yaratmış və ondan sonra da əksər lirik poema müəllifləri Nizaminin forma və üslubundan bəhrələnmişlər.
Bu məqalədə adlarını çəkdiyimiz şairlər və onların əsərlərindən gətirdiyimiz nümunələr məsnəvi-poema janrının lirik-epik janr olaraq inkişaf dinamikasını əks etdirir.
Nizami məktəbinin təsiri altında lirik şeir parçası qələmə alan şairlərdən biri də qacarlar sülaləsinin ikinci hökmdarı Fətəli şah Qacar olmuşdur. Məsnəvi formasında yazılmış bu əsər həcmcə kiçik olmağına baxmayaraq, məna və məzmun, poetik xüsusiyyətləri baxımından kamil bir bədii əsərdir.